Ada reké katuturan satua “Nang Bangsing tekén I Belog” Kacerita ada anak makanténan ajaka dadua, madan Nang Bangsing tekén I Belog. Leketné matimpal mula madasar kénéh pada rena, briak-briuk ajaka dadua saling silihin, saling tulungin.
Kacerita, Nang Basing ngajakin I Belog makena bubu. I Belog nyanggupin pangajak Nang Bangsingé lakar bareng makena bubu, laut ngomong kéné. “Nah Beli, apa anggon baneh bubuné, turin dija anaké makena bubu?”
Dadi pesu jailné Nang Bangsing, turin masaut sada guyu, “Buat baneh bubu tuah jaja kukus akuskusan, tekén unti nyuh abungkul magula bali, kenang lantas di pagehané!” Buin maninné, semengan I Belog meli ketan acééng, nyuh abungkul muah gula duang tebih. Di subané lebeng jaja kukusé, lantas banehina bubunné, lantas kenaanga di pagehané.
Kacrita Nang Bangsing makena bubu di tukadé. Suba pada suud makena bubu lantas ia mapiguman. Kéné munyiné Nang Bangsing, “Belog, wiréh ajak dadua suba makena bubu, jalan sirep selidan, buin mani apang semengan ngangkid bubu.” Déning kéto, sajaan nu selidan koné suba I Belog pules. Ditu lantas Nang Bangsing bangun uli pasaréan nyemak bubunné, daara jajanné kanti telah. Di subané telah, lantas bubunné I Belog pejunina, laut kalahina mulihné.
Gelisin satua, suba koné makruyuk siapé mara acepok, enten lantas I Belog tur bangun ngléjat laut ia ngalih Nang Bangsing, “Nang Bangsing, suba semengan dong jalan angkid bubuné!” Kéto I Belog ngajakin Nang Bangsing. “Endén malu.” Kéto ia uli di pasirepan, lantas antianga koné tekén I Belog.
Buin kejepné makruyuk siapé buin acepok, ditu buin dunduna Nang Bangsing baan I Belog, “Beli Nang Bangsing, mai suba angkid bubuné, suba lemah né.” Buin ia masaut, “Endén ké sedeng jaenné pulesé, antosang buin aklepugan!” Ngepah tur garang legu I Belog ngantosang Nang Bangsing pules. Wiréh suba ngades lemah, buin kaukina Nang Bangsing tekén I Belog, “Jalan té énggalang angkid bubuné nyanan maluina tekén pisagané!” Kéto abetné.
Suba nyak bangun Nang Bangsing mapi-mapi kapupungan, kijap-kijap, tur masaut, “Ja…a…lan, jalan, Belog!” Ditu ajaka dadua majalan ngangkid bubu. Kacerita mara angkida bubunné I Belog sagét bek misi tai, nanging banehné telah. Béh sing kodag koné gedeg basangné sambilanga ngrengkeng, “Né bubu apa ténénan dadi bek misi tai.” Kéto munyinné I Belog sambilanga ngediang tainé.
Kacrita mulih lantas I Belog ngaba bubu puyung. Buin kejepné teka Nang Bangsing magréndotan ngaba bubu, tur liu misi bé, ada udang, lindung, deleg, lélé, kulen, muah ané lénan. Ditu lantas matakon I Belog tekén Nang Bangsing, “Nang Bangsing, kénkén ya dadi bek bubun icangé misi tai buina banehné telah?”
Masaut lantas Nang Bangsing, “O kéto? Ah, da kapok. Buin mani da ditu makena bubu, ditu laku di punyan nyuhé, tur salinin banehné. Nangka tasak anggon baneh!” Sajaan koné lantas I Belog ngalih nangka nasak anggona baneh bubunné, laut kenaanga ba duur di punyan nyuhé.
Nang Bangsing makena masi bubu, nanging betén nyuhé ané kenaina bubu baan I Belog, déning ditu ada telabah ané liu misi bé. Di subanné pada suud makena bubu, lantas mulih ajaka dadua.
Kacrita suba tengah lemeng buin aliha bubunné I Belog tekén Nang Bangsing, baneh nangkané juanga abana mulih tur buin ia masaré. Gelisin satua, suba koné lemah, bangun lantas I Belog, tur ngangkid bubunné. Mara jemaka puyung buina banehné telah. Gedeg pesan basangné I Belog, “Béh, saking ja bubuné bantug, melahan suba jani tektek polonné.”
Mara ukana tekteka bubuné I Belog, sagét ada Kedis Selem teka uli kaja kangin, jeg macelep ka tengah bubunné. Ngon tur liwat kendel I Belog, “Béh, jani ja payu maan bé, gantin déwéké taén naar bé kedis.” Kéto munyinné I Belog. Masaut koné I Kedis Selem, “Yéh Cai Belog, da Cai nampah waké. Yan Cai tusing nampah waké, apa ja idih Cai, lakar baang.”
Masaut I Belog, “Dija ada unduk kedis bisa maang ngidih, apa Iba ngelah? Melahan tampah dogén suba jani.” Buin masaut ikedis, “Kéné Belog, yan Cai tusing ngugu munyin wakéné, né bulun wakéné abut akatih lantas keberang, kija ja pajalan bulun wakéné nyanan tututin dogén!”.
Abuta bulun kampid I kedisé akatih, lantas lébanga kedisé. Makeber koné I Kedis Selem ngaja kanginan. Keberanga bulun kedisé ngapirpir ngaja kanginan, tugtuga baan I Belog. Yen adéng pajalanné I Belog, bulun kedisé adéng koné pakeberné. Yen I Belog mecatang, bulun kedisé bareng masi becat
Suba joh pajalanné I Belog nututin pakeber bulun kedisé, sagét nepukin ia puri melah pesan. Neked di jaban kori agungé, ilang koné bulun kedisé totonan. Sing kodag ibuk kenehné I Belog tur ngrengkeng buka kéné, “Ah, saking ja mula kedis jail, déwéké belog- beloga, jani mara neked dini ilang polonné, lén sing ja mabekel nang akéténg, kalud jani basangé suba seduk.” Kéto abetné I Belog.
Ada koné parekan ané nuénang puriné, ningeh munyin I Belogé. Takonina I Belog, “Ih, Jero, sampunang jeroné ngraos kénten, nyen uningina tekén Anaké Agung driki, janten jeroné ngemasin sisip. Jeroné jadma saking dija?”
Masaut I Belog, “Ah, apin ja sisip depang ya, anak saja kedis beler melog-melog tiang.” Mara kéto pasautné I Belog, ngénggalang I Parekan matur tekén Ida Anaké Agung, nguningang saindik-indikné I Belog. Ida Anaké Agung lantas ngandikain I Belog parek ka puri tur ngandika, “Ih Belog, Cai nyak nunas nasi dini?”
Matur I Belog, “Inggih, tiang nunas Atu, basang tiangé seduk gati, uling ibi tiang ten kena nasi.” Mara kéto aturné I Belog, lantas kandikaang parekanné nyagiang I Belog. Kacerita jani, I Belog suba ngarepin sagi, nanging nasiné tuah abedik, ditu ia ngrengkeng, “Béh, tuah amoné icena nunas nasi, dasar Anak Agung demit pait makilit.” Kéto kenehné I Belog, nanging tunasa masi nasiné ento. Sabilang daara, enu dogén buin asopan, kéto masi bénné sing ja bisa telah. Di subanné I Belog masa wareg, mara nasiné telah.
Suud nunas, I Belog malali-lali di jabaan. Sedekan ia klicak- klicak, ditu ia kaukina baan bala panunggun lawang, “Ih Belog, mai ja malu!” Mara kéto raosné, énggal I Belog nyagjag tur ia matakon, “Ngéngkén jero?” Masaut panunggun lawangé, “Kéné Belog, yén padé Cai icéna barang-barang olih Ida Anaké Agung eda nyakanga, ento ada jaran berag, to men tunas!”
“Nah, yan kéto tiang ngidepang.” Kéto pasautné I Belog bebelogan. Suba kéto lantas takonina I Belog tekén Anaké Agung, “Ih Belog, jani apa lakar tunas Cai tekén gelah? Cai demen tekén kamben, pipis, mas, muah ané lén-lénan?”
Matur I Belog, “Inggih Ratu Dewagung, titiang nénten nunas napi-napi, yén I Ratu lédang, kudané sané berag jagi tunas titiang,” Ngandika Anaké Agung, “Wih, nak nguda jaran demenin Cai? Cai awak tusing ngelah apa. Né jaran gelahé anak nagih pedeman melah. Kénkén ja pedeman Cainé, apang kéto masi pedeman jarané, amah- amahané kéto masi. Yen Cai naar nasi misi bé, jarané patuh nagih bé. Cendekné apa ja dedaaran Cainé, jarané ané kéto baang!”.
Matur I Belog, “Inggih Ratu, yadian asapunika, sasidan-sidan antuk titiang ngubuhin.” Ngandika buin Ida, “Nah yén kéto Belog, juang suba jaran gelahé ento, gelah sing ja lakar mucingin.”
Kandikain I Parekan, “Ih parekan, kema jemakang I Belog jarané ané berag!” Majalan I Parekan nyemak jarané baanga I Belog. Mapamit I Belog, jarané ento kategakin. Wiréh jaran berag, tusing nyidang malaib. Kedenga talin padangalané, makipekan kori jarané tan mari ia majalan bejag-bejug dasdasan I Belog labuhanga.
Tan carita I Belog di jalan, énggal koné ia neked jumahné. Tengkejut I Belog ban jarané mejunang pipis mabrarakan liu gati. Énggal ia ngampilang pipisé apang tusing ada anak nepukin. Suba maan mategtegan, ditu lantas I Belog ngaukin méménné tur kabaang ngidih pipis. Méménné tangkejut laut matakon, “Belog, dija Cai maan pipis liu buka kéné?”
Masaut I Belog, “Mémé siep dogén, kema bayah utangé dija ja ngelah anggehan! Kema Mémé ka peken beliang icang bé céléng, lakar basa, baas liunang, sambilang masi ngaukin brayané ajak mulih apang ada nulungin malebengan!” Encol méménné mayah anggehan tur ka peken meli magenepan lakar anggona mébat-ébatan.
Suba jangkep beblanjané, Mén Belog lantas mulih sambilanga masi ngaukin brayané apanga nulungin déwékné mébat. Kacrita jani pisaga muah nyamanné I Belog suba pada teka. I Belog ngatikang brayané nglawar. Suba suud malebengan, I Belog nyagiang jarané sagi agenepan. Suba pragat maang jarané ngamah, lantas tamiuné ajaka madaar baan I Belog. Suud madaar, dimulihé makejang koné tamiunné baanga kaputan nasi misi bé, tum, lawar, muah jukut arés baan méménné I Belog.
Dimulihé, tamiuné tepukina tekén Nang Bangsing, lantas ia matakon, “Ih Bapa, Beli, Mbok ajak makejang teka uli dija né, teka uli kundangan aa?” Masaut lantas ané takonina kéné. “Aa, bapa uli kundangan sig umahné I Belog.” Kéto abetné makejang masaut buka briukan panggulé, patuh pasautné.
Makesiab Nang Bangsing, wiréh tusing pantes I Belog nyidang ngingu anak liu, kadirasa ané daara padidi dogén kuangan. Dot Nang Bangsing matakon. Éngap-inget koné pajalanné Nang Bangsing ngojog umahné I Belog. Mara ia macelep. Kasapa ban I Belog kéné, “Beli Nang Bangsing, apa ada saratang Beli?” Sada elek Nang Bangsing matakon, “Kéné Belog, beli ningeh Cai liu nekaang braya ajak Cai mébat-ébatan, dija Cai maan pipis?”
I Belog masaut bebelogan, “O… unduk to saja Beli icang ngundang-undang.” Katuturang urah-arih déwékné maan nunas jaran di puri. Mara kéto munyinné I Belog, déning Nang Bangsing mula anak iriati, ditu lantas siliha jaranné I Belog.
I Belog ja lega masi nyilihang, kene munyine. “Kéné Beli Nang Bangsing, yan Beli nyilih jaran icangé, kénkén ja dedaaran Beliné ajak makejang jumah, jarané musti ané kéto baang, tur pamedemanné masih kéto, kénkén ja pasaréan Beliné apang kéto masi pedeman jarané!” Kéto pabesenné I Belog tekén Nang Bangsing.
Masaut Nang Bangsing, “Yadin kéto Beli tusing kaberatan.” Buin koné I Belog nyekenang, “Nanging Beli, yan pét mati jaran icangé, da tanema jumah Beli, mai aba kumah icangé!” “Nah.” Kéto Nang Bangsing, nglaut jemaka jaran I Belogé baan Nang Bangsing.
Suba neked jumahné, Nang Bangsing ngorahin kurenané, nyakan ané jaen-jaen tur apanga ngundang brayané ajaka mapésta jumahné. Inceg kurenané ngundang, Para tamiuné suba pada teka, lakar olah-olahané suba masi pada tegep. Pakrubuk nyamanné ngolah tur kacrita énggal suba pada lebeng. Makedus koné bon olah-olahané jaen pesan, suba pada pragat masagi, ditu lantas krama banjaré ajaka madaaran. Suba pada madaar, makejang brayané mulih.
Gelising cerita, Nang Bangsing buin nundén kurenané apanga meli kasur, galeng, muah tikeh ané melah-melah. Nang Bangsing bincuh ngayahin jarané, empek-empeka maang nasi, bé, lawar, goréngan, muah ané lénan. Acepané apanga jarané liu mesuang pipis.
Kacerita suba sanja, lantas celepanga jarané kumah metén, tur dampingina pedeman makasur lan matikeh anyar. Suba tengah lemeng, meju koné jarané, mejuang tai mising wiréh bes lebihan ngamah lawar.
Kacerita Nang Bangsing ajaka kurenané pakisi, “Nanangné, turah icang jarané lakar mejuang pipis akroso, itunian dingeh icang jarané suba meju pakrécék ulungan tainné, sinah suba ento mas, pérak, slaka mabrarakan, dong énggalang jemak kumah metén!” Kéto munyinné ané luh nundun somahné.
Masaut Nang Bangsing, “Wéé méméné eda téh uyut, né nu peteng guminné mani semengan duduk alihang kisa apang melah baan ngaba.” Men Bangsing nimbal, “Nah kéto ja kéto, nyaan maluina baan pisagané nuduk kanggoang talin pagehan mani goréng!”
Suba jani semengan, béh saling pamaluin ané luh ajaka ané muani ngampakang jelanan dot lakar nuduk tain jarane. Mara ia madelokan kumah metén, tepukina tain jarané mabrarakan ngebekin rongan tur boné malekag. Mén Bangsing kanti ngutah-utah ngadek bon tain jarané buka kéto.
Nang Bangsing brangti pesan tekén I Belog tur ngrengkeng kéné, “Béh, tendas bedag I Belog, belog-beloga déwéké, kalud pipisé telah anggon namiu, ludin jumahan metén bek misi tai. Ah da kéto, cendek jani makeneh, bakal matiang dogén suba jarané ténénan.” Agia Nang Bangsing nyemak madik, sepegina makapatpat batis jarané laut goroka baongné.
Kacerita I Belog, wiréh makelo suba jarané siliha baan Nang Bangsing kondén masi ulihanga, pesu kenehné lakar ngalih jaranné kumah Nang Bangsing. “Beli, Nang Bangsing, jaran icangé dija?” Masaut Nang Bangsing, “Béh, jarané makelo suba matiang beli, wiréh ia mejunin tai mising, bek metén beliné misi tai.
Masaut I Belog, “Béh, amonto suba seken pabesen icangé tekén Beli, dadi Beli tuara ngingetang. Men dija bangkén jarané?” “Ditu tanem beli ba danginé.” Kéto pasautné Nang Bangsing nlegdeg. I Belog tusing liu raos, nyrutcut ia nganginang ngojog tongos ané patujuina baan Nang Bangsing, alih-alihina laad gegumuk nanem jarané. Suba tepukina, ditu bétén bangkén jarané laut abana mulih pratékana tur tanema di sanggah kamulané.
Suba makelo-kelo, di tongos I Belogé nanem jarané mentik tiing petung duang katih tur tegeh ngalik. Nuju ada ujan bales, bah lantas tiingé totonan, ané akatih bah ngerobin peken Sangsité, ané buin katihné bah ngerobin peken Badungé. Critaang koné punyan tiingé ané ebah ka peken Badungé, liu anaké mameken ngejangin kamen, baju, senteng, kancrik, saput, sarung, jalér, muah ané lén- lénan kanti bek misi magenepan.
Kéto masi ané ebah ka peken Sangsité ada anak ngantungin urutan, déngdéng, lindung, muah ané lénan sarwa dedaarané ané jaen- jaen. Di subanné bek pada tiingé misi maéndahan, ditu buin koné lantas majujuk. Béh, bek umahné I Belog misi sarwa panganggo muah dedaaran ané sarwa luih-luih.
Mara kéto, prajani I Belog dadi anak sugih, liu ngelah arta brana, buina yan nuju ia pesu ka jalané, panganggoné setata makrénéb ngawinang ngon anaké ané nepukin. Kéto masi méménné lén pesan bawané ngajak ipidan, tusing nu sétsét pasuranting panganggoné, suba nuutin cara pianakné kedas gading. Paundukan I Belog buka kéto buin koné dingeha baan Nang Bangsing. Patuh cara ané maluan, buin koné masi siliha tiingné I Belog baan Nang Bangsing. Kéto masi I Belog tusing nemitang, buin masi baanga nyilih.
Kacerita jani Nang Bangsing suba nanem tiingé di sanggahné. Di subanné majujuk, buin bah tingé ka peken Sangsité muah ka peken Badungé. Ditu para dagangé pakrimik, sawiréh ipidan dugas tiingé kagantungin baju, kamben, muah ané lénan bisa ilang. Jani gedegbasangné. Tiingé kagantungin sarwa ané pengit, ada bangkén kucit, bangkén bikul, sera, leluu, mis bengu, muah ané lénan. Ané bah ka peken Sangsité masi kéto ada ané ngantungin bangkén cicing, bangkén méong, kamben wék, sandal pegat, muah sarwa leledané.
Gelisan satua, tiingé makadadua buin majujuk. Jeg paglebug ulung bangké muah sarwa ané bengu jumah Nang Bangsingé. Bincuh ia ngidih tulungan ajaka ngisidang sakancan bangké muah beberekané ento. Kanti telah kasugihané anggona mupahang ngedasin umahne. Ulian ngetohin iriati tur momo angkara, pamuput Nang Bangsing dadi lacur, I Belog nyalinin dadi sugih.