Ada koné katuturan satua “I Kelesih”. Kacarita di penegara Sunantara ada koné Sang Prabu kalintang kasub wibuhing bala di jagaté. Ida madué asu aukud madan I Blanguyung. Asuné ento melah pesan gobané tur andel kanggén nyarengin Ida Sang Prabu ri tatkala Ida maboros. Apa karanané Ida Sang Prabu andel ring asuné ento, tusing ja ada lén sawiréh asuné ento ngelah kautaman yen ia ngongkong kipek kaja grubug sakancan buroné ba daja, yen ia ngongkong kipek kauh, grubug sakancan buroné ba dauh, kéto masih kipek ané lénan.
Ento makrana aluh antuk Ida ngejuk buroné ané suba kasakitan (grubug). Sawiréh sesai buka akéto, sangkep lantas para buroné makejang. Pinaka pamucuk pasangkepané tusing ja ada lén mula ia I Sangmong rajan buroné. Jani kacerita suba makelo para buroné sangkep, masi tusing nyidang pragat, sawiréh tusing ada bani bakal ngamatiang I Blanguyung. Ento makrana rajan buronné I Sangmong mesuang séwamara. Kéné uger-uger paséwamarané, “Nyén ja nyidaang ngamatiang ia I Blanguyung bakal adegang waké ratu dini di alasé, kasungkemin ajak makejang”.
Sawatek buroné, tusing ada bani ngisinin buka pamunyin sewamarané ento. Kacarita ada koné Kelesih intil-intil tur matur tekén I Sangmong, “Ratu Sang Prabu tiang misadia ngamiletin sewamarané, sakéwanten sida tan sida antuk titiang taler druényang”. Masaut I Sangmong, “Nah yen kéto ja raos Ibané Kelesih, yen tuara sida baan Iba, kai tusing ja bakél ngénkénang Iba. Nah kema jani iba majalan!”. Gelisin satua, teked I Kelesih sig purin Ida Sang Prabu ané nruénang asu blanguyungé ento, tur ngojog ia ka pawaregan. Ditu ia I Kelesih nongos di nebé nyangkrut. Kacarita suba liwat sandikala Ida Sang Prabu jagi marayunan kairing antuk asuné I Blanguyung. Ri sedek Ida marayunan tumuli I Kelesih dengak-dengok uli di slagan raab nebé, ento makrana I Blanguyung kecas-kecos.
Nyingakin asuné kecos-kecos mararyan Ida Sang Prabu ngerayunan, ngaksi ileh-ileh apa ané ngranang ia I Blanguyung kecas- kecos. Tuara Ida nyingakin napi-napi. Suba kéto, buin ida marayunan. Buin kejepané, buin I Kelesih dengak-dengok, ngranang nyangetan gedegné I Blanguyung, laut ia makecos tegeh bakat trugaha rayunan Ida Sang Prabu kanti piring muah rayunané ulung makacakan. Duka Ida Sang Prabu raris ngambil kléwang jag sepega ia I Blanguyung, pegat baongné lantas mati.
Disubané I Blanguyung mati, mara Ida Sang Prabu éling ring raga kangen tekéning I Blanguyung mati. Raris Ida makayun-kayun tur macacingak majeng menék. Ada kaaksi I Kelesih di selagan nebé. Ngénggalang lantas I Kelesih malaib nuju sig I Sangmongé. Sapatinggal I Kelesih kacaritanan jani kasungsutan kayun Ida Sang Prabu, sawireh asuné padem. Gelisin satua nangkil ia I Kelesih tekén I Sangmong, sawireh ia I Kelesih suba nyidaang ngamatiang I Blanguyung, jani pantes adégang Ratu dini.